ក្រោយឆ្លងកាត់ព្យុះភ្លៀងជាច្រើនសម័យកាល និងបំពេញតួនាទីជាកន្លែងចម្លងមនុស្សតាមដែនអាកាសជូនភ្ញៀវជាតិ និងអន្តរជាតិសម្រាប់កម្ពុជាអស់រយៈពេល ៦៦ឆ្នាំ ចាប់តាំងពីឆ្នាំ១៩៥៩មក ព្រលានយន្តហោះពោធិ៍ចិនតុង ត្រូវបិទដំណើរការទាំងស្រុង នៅម៉ោង០០៖០០នាទីយប់រំលងអាធ្រាត្រឈានចូលថ្ងៃទី៩ ខែកញ្ញា ឆ្នាំ២០២៥ ខណៈវាបានបន្សល់ទុកនូវអនុស្សាវរីយ៍ និងការចងចាំជាច្រើន សម្រាប់អ្នកដំណើរទាំងជាតិ និងអន្តរជាតិ។
អ្នកនាំពាក្យអាកាសចរណ៍ស៊ីវិល លោក ស៊ិន ចាន់សិរិវុត្ថា បានលើកឡើងថា បើគ្មានអ្វីប្រែប្រួលទេ កម្ពុជានឹងផ្ទេរជើងហោះហើរពីអាកាសយានដ្ឋានអន្តរជាតិភ្នំពេញ (ព្រលានយន្តហោះពោធិ៍ចិនតុង) ទៅអាកាសយានដ្ឋានអន្តរជាតិតេជោ នៅថ្ងៃទី១០ ខែកក្កដា ។ សម្រាប់ជើងហោះហើរចុងក្រោយគេបង្អស់ជាប្រវត្តិសាស្ត្រ មុននឹងបិទដំណើរការព្រលានយន្តហោះអន្តរជាតិពោធិ៍ចិនតុង គឺជាជើងហោះហើរ Korean Air។
អាកាសយានដ្ឋានអន្តរជាតិភ្នំពេញជាច្រកចូលអន្តរជាតិចម្បង និងសកម្មបំផុតរបស់ប្រទេសកម្ពុជាកាលពីពេលកន្លងមកសម្រាប់នាំចេញនាំចូលផលិតផលដល់សេដ្ឋកិច្ចកម្ពុជា និងជាកន្លងដែលបម្រើដល់រដ្ឋាភិបាល ជាមួយការទទួលបដិសណ្ឋាកិច្ចដល់ភ្ញៀវអន្តរជាតិ និងថ្នាក់ដឹងនាំពីបណ្តាប្រទេសនានាជុំវិញពិភពលោកផងដែរ។
គូសបញ្ជាក់ដែរថា អាកាសយានដ្ឋានអន្តរជាតិភ្នំពេញ ជាអាកាសយានដ្ឋានដំបូងគេនៅកម្ពុជា ដែលត្រូវបានចាប់កសាងជាលើកដំបូងដោយបារាំងនៅឆ្នាំ ១៩៥៧ រួចធ្វើពិធីសម្ពោធនៅថ្ងៃទី ១៩ មករា ១៩៥៩ ដោយមានឈ្មោះថា អាកាសយាន្តដ្ឋានអន្តរជាតិពោធិ៍ចិនតុង។ នៅខែតុលា ១៩៩៤ ផ្លូវរត់ឡើងចំងាយ ៣០០០ម ត្រូវបានទទួលការរ៉ាប់រងជួសជុលជាថ្មីឡើងវិញដោយក្រុមហ៊ុន MEADA របស់ជប៉ុន។ បន្ទាប់មកផ្លូវរត់ឡើងត្រូវបានសាងសង់បន្ថែមប្រវែង ៣៥០ម៉ែត្រ ទៀតដោយក្រុមហ៊ុនបារាំង G.T.M (Grand Travaux de Marseille) សំរាប់លទ្ធភាពចុះចតនៃយន្តហោះធុនធំដូច ATR Boeing332 Boeing337 Boeing447 ជាដើម។ អាកាសយានដ្ឋានអន្តរជាតិពោធិ៍ចិនតុង ត្រូវបានប្តូរឈ្មោះទៅជាអាកាសយានដ្ឋានអន្តរជាតិភ្នំពេញនៅថ្ងៃទី ១៥ មករា ២០០៣។
ដោយហេតុថា អាកាសយានដ្ឋានអន្តរជាតិភ្នំពេញបច្ចុប្បន្ន មានផ្ទៃដីមានលក្ខណៈតូចចង្អៀត ទីតាំងស្ថិតចំកណ្តាលរាជធានីភ្នំពេញ និងក្នុងតំបន់ប្រតិបត្តិការអាកាសយានដ្ឋានបច្ចុប្បន្ន ពោរពេញទៅដោយសំណង់អគារខ្ពស់ៗ ដែលជាឧបសគ្គដល់សុវត្ថិភាពកិច្ចប្រតិបត្តិការហោះឡើង និងចុះចតអាកាសយានគ្រប់ប្រភេទ និងជុំវិញបរិវេណអាកាសយានដ្ឋាន ក៏ហុំព័ទ្ធដោយសំណង់លំនៅដ្ឋារបស់ប្រជាពលរដ្ឋជាច្រើនណែនណាន់តាន់តាប់ផងដែរ ដែលជាឧបសគ្គមិនអាចធ្វើការអភិវឌ្ឍពង្រីកបន្ថែមបានស្របតាមផែនការមេនៃអាកាសយានដ្ឋានអន្តរជាតិភ្នំពេញលំដាប់ 4Fឈ្មោះថា«អាកាសយានដ្ឋានអន្តរជាតិតេជោ» ត្រូវបើកដំណើរការកាលពីថ្ងៃទី៩ ខែកញ្ញា ឆ្នាំ២០២៥តទៅ។
ចាប់ពីពេលនេះទៅអាកាសយានដ្ឋានអន្តរជាតិភ្នំពេញ ត្រូវបានបិទដំណើរការជាស្ថាពរមិនអាចត្រឡប់វិញបានទេ ត្រឹមតែបន្សស់ទុកនៅអនុស្សារីយ៍ និងក្តីនឹងរលឹកជូនភ្ញៀវទេសចរណ៍ជាតិ និងអន្តរជាតិតែប៉ុណ្ណោះ៕
អត្ថបទដោយ៖ កណ្ណិការ
