សម័យកាន់តែទំនើបការរស់នៅកាន់តែស្រួលរបស់ហូបកាន់តែសម្បូរបែបជីវិតមនុស្សក៏កាន់តែប្រឈមនឹងជំងឺច្រើនណាស់ដែរ។បើចង់បញ្ចៀសបញ្ហាសុខភាពនានាយើងត្រូវចេះកំណត់គោលដៅឲ្យច្បាស់លាស់ បើមិនអ៊ីចឹងធានាមានអ្នកបោះបង់ទាំងដែលបានចាប់ផ្ដើមហើយចុងក្រោយចិញ្ចឹមជំងឺពេញមួយជីវិត។
១- កំណត់កត្តាលើកទឹកចិត្តខាងក្នុងខ្លួន
និយាយឲ្យស្រួលស្ដាប់គឺធ្វើដើម្បីអ្វី? ហើយគោលដៅនោះត្រូវមានលក្ខណៈយូរអង្វែងមិនមែនមួយឆាវចម្អិនកំពឹសទេ។ ឧទាហរណ៍ ការចង់ស្រកគីឡដើម្បីមានសុខភាពល្អមានកម្លាំងធ្វើការបានកាន់តែល្អជាដើមនោះគឺសុទ្ធជាការលើកទឹកចិត្តខាងក្នុងខ្លួនបើធៀបការព្យាយាមចង់គីឡូដើម្បីគ្រាន់តែមានរាងស្អាតត្រៀមចូលរោងការតែប៉ុណ្ណឹងនោះទេ។
២- បង្កើតគោលដៅតាមរូបមន្ត SMART=(Specific, Measurable, Achievable, Relevant, and Time-bound)
SMART មកពីពាក្យមានន័យថាជាក់លាក់អាចវាស់ស្ទង់អាចសម្រេចបានភាពជាប់ទាក់ទងនិងពេលវេលាដែលត្រូវចាត់ទុកជាតិចនិកកំណត់គោលដៅមានប្រសិទ្ធភាពត្រូវប្រាកដថាគោលដៅយើងបានកំណត់ត្រូវលេចរូបរាងនិងត្រឹមត្រូវច្បាស់លាស់អាចវាស់វែងជាមួយពេលវេលានិងត្រូវភ្ជាប់ទំនាក់ទំនងការជំរុញទឹកចិត្តពីខាងក្នុងខ្លួន។
៣- ជ្រើសរើសទម្លាប់ណាយើងចូលចិត្ត
ទោះមិនចូលចិត្តទម្លាប់សម្រាប់គោលដៅសុខភាពក្តី គួរប្តេជ្ញាចិត្តថែរក្សាទម្លាប់ឲ្យបានដោយជ្រើសរើសទម្លាប់ ឬសកម្មភាពសាមញ្ញណាមួយយើងចូលចិត្តទម្លាប់ហាត់ប្រាណជួយបង្កើនអ័រម៉ូនអង់ដូហ្វីន (Endorphins ) នាំឲ្យយើងមានអារម្មណ៍និងគំនិតវិជ្ជមានដើម្បីបន្តអនុវត្តគោលដៅសុខភាពសម្រាប់ជីវិត។ កំណត់សកម្មភាពសប្បាយៗបញ្ចូលទៅក្នុងទម្លាប់សុខភាពដូចជាស្តាប់ចម្រៀងពេលកំពុងដើរលើម៉ាស៊ីនហាត់ប្រាណឬហាត់ប្រាណតាមការណែនាំលើ YouTube ក៏ជារឿងល្អ។
៤- ត្រៀមប្រឈមមុខនឹងបរាជ័យ
យើងគ្រប់គ្នាសុទ្ធតែអាចបរាជ័យចំពោះការបេ្តជ្ញាបង្កើតទម្លាប់ណាមួយទោះលទ្ធផលទទួលបានទាបជាងអ្វីយើងរំពឹងទុកក៏ត្រូវបន្តមិនគួរបោះបង់ចោលទេ។
ការផ្លាស់ប្តូរទម្លាប់ចាំបាច់ណាស់ដើម្បីធានាឲ្យមានសុខភាពល្អយូរអង្វែងមិនត្រូវឲ្យលេសតិចតួចធ្វើឲ្យយើងបកក្រោយវិញជាដាច់ខាតដូចជា ជួបជុំមិត្តភ័ក្ដិ ឬហាត់ប្រាណមិនគ្រប់គ្រាន់ព្រោះត្រូវត្រៀមខ្លួនសម្រាប់ពិធីអ្វីមួយសុទ្ធតែអាចធ្វើឲ្យយើងបោះបង់គោលដៅ ហេតុនេះត្រូវដឹងខ្លួនឯងឲ្យច្បាស់ហើយបន្តអនុវត្តគោលដៅនៅថ្ងៃបន្ទាប់។
៥- អបអរខ្លួនឯង
ត្រូវចេះសរសើរខ្លួនឯងទទួលស្គាល់ជោគជ័យទោះតិចតួចក្ដីព្យាយាមផ្ដោតលើអ្វីយើងគិតថាជាចំណុចខ្វះខាតនិងកែលម្អឡើងវិញកាន់តែជួយឲ្យជំនឿចិត្តយើងមោះមុតខ្លាំងឡើង។
៦. ការគិតវិជ្ជមាននិងភាពទន់ភ្លន់ចំពោះខ្លួនឯង
• កុំបន្ទោសខ្លួនឯងខ្លាំងពេកពេលបរាជ័យម្តងម្កាល (ឧទាហរណ៍៖ ថ្ងៃខ្លះញ៉ាំច្រើន ឬរំលងការហាត់ប្រាណ)ទទួលស្គាល់ថាវាជារឿងធម្មតា ហើយចាប់ផ្តើមឡើងវិញនៅថ្ងៃបន្ទាប់។
• ប្រើពាក្យលើកទឹកចិត្តខ្លួនឯងវិជ្ជមាន (Self-talk) ដូចជា "ខ្ញុំអាចព្យាយាមម្តងទៀតបាន" ជាជាង "ខ្ញុំជាមនុស្សអន់ ធ្វើមិនបានទេ"។
គោលដៅសុខភាពអាចសម្រាប់សុខភាពផ្លូវកាយដូចជាសម្រកទម្ងន់បង្កើនកម្លាំងល្បឿនឬថាមពលពេលខ្លះក៏អាចសម្រាប់សុខភាពផ្លូវចិត្តដូចជា គ្រប់គ្រងលើការឈឺចាប់ភាពតានតឹងអារម្មណ៍ឆេវឆាវឬអាចជួយយើងចេះប្រើគំនិតវិជ្ជមានឈានទៅរកជោគជ័យថ្មីមួយប្រសើរជាងអង្គុយគិតថាខ្លួនឯងបរាជ័យ។ទោះជាគោលដៅអ្វីក៏ដោយត្រូវប្រាកដថាយើងអាចជួយឲ្យខ្លួនឯងប្រសើរជាងមុនបន្តិចម្តងៗលទ្ធផលទទួលបានតិចតួចក្ដីក៏គួរចាត់ទុកជាជោគជ័យមួយដែរ។ ក្រោយទទួលបានជោគជ័យរង្វាន់សម្រាប់ខ្លួនយើង អាចជាការថតរូបឬរក្សាទុកកំណត់ហេតុគំនិតវិជ្ជមានក៏ជាផ្នែកមួយជួយលើកទឹកចិត្តសម្រាប់គោលដៅផ្សេងៗទៀតនាពេលអនាគត។
អត្ថបទ៖ ជួន សុធា
